Albert Maquet a skepyî li 22 d' may 1922 a Lidje. Il î a morou li 1î d' fevrî 2009.

Relî dins li ptite et l' grande antolodjeye da Piron.

Di s' mestî, il esteut prof d' itålyin a l' Univiersité d' Lidje.

Il a scrît bråmint des arimés, et-z eplaidî des coûtès ramexhnêyes. I scrijha, avou, del prôze-powezeye.

Il a ossu foirdjî sacwantès pîces di teyåte e walon, inte di zeles, des redjårbaedjes di des scrijheus itålyins did dinltins. Ey ossu des scrijheus k' eployèt des lingaedjes diléreces di l' Itåleye.

Il a eto studyî, e francès, sacwants scrijheus e walon, copurade des ptits fjheus d' arimés, rovyîs pa l' istwere. Il a scrît sol teyåte e walon, po dmander on pus hôt livea do tecse, et di l' esinnaedje.

Ses scrijhaedjes e francès ont stî rsintous come foirt grandiveus pa bråmint des waloneus.

Il esteut SLLW-î; il î moussa e 1956. Il evoya des cåkêyes di papîs po leus rvowes.

Il a wangnî li Pris del Veye di Lidje e 1987.

• Djeu d' apeles (1947)
• D' å fond do tins ratournaedje di powezeyes da Tavo Burat (1993)
• Poèmes de l'Antiquité grecque et romaine adaptés en wallon liégeois, on live eplaidî a MicRomania e 2001.
• Poésie en langue wallonne du pays de Liège, on relijha di tecses riprins cronolodjicmint di sacwants ôtes livrets, eplaidî a MicRomania e 2004.
• Cint haycous, ene ramexhnêye di haycous, eplaideye al pitite coleccion del SLLW e 2006.
• Sins rime ni rame (2008)

Come sicrijheu d' teyåte e walon, on lyi doet :

• "Sadi Hozete", ene pîce a ene djin djouwêye al televuzion pa Joseph Duysinx.
• "Califice, l' ome di nole pårt et d' ene sawice"
• "Li paltot" (pîce po l' radio, d' après l' istwere do minme no da Gogol).
• "Li harloucrale" (d' après La Mandragola, d' eviè 1512, da Niccolò Machiavelli
• "Ratacans, mes efants" (pîce po l' radio)
• "Li guere å cou" et "L' araedje e cour" (d' après des dvizes e patwès da Ruzante.

Albert Maquet esteut puvite conte el rfondou, tot vlant d' eployî des noûmots. Mins nerén, lu-minme askepia li noûmot walon "harloucrale".

E 1994, i pretinda ki les scrijhaedjes e walon ni s' plént nén passer foû del Walonreye. C' est ene des råjhons pocwè el live « So l' anuti » a stî scrît. Dj' ô bén : po disdire ciste idêye la.

I n' djåzéve nén voltî walon e societé.

• Onk di ses scrijhaedjes rashiou e rfondou (so l' Aberteke)
• (fr) On corwaitaedje da sinne so les belès letes e walon