Ël prim repert archeològich dël borgh a l'é belfé che a sia col ëd në schéletr ësquasi antregh ëd na bes-cia preistòrica dla specie Equus hydruntinus, trovà ant ël 1970. Belavans al dì d'ancheuj dlë schéletr a son salvasse mach dontré dent, che a son ëstàit esaminà da j'archeòlogh për identifichè la bes-cia. Gnanca ël sit precis a l'é nen podusse identifiché, donca cola dla colocassion an Vian-a a resta mach na suposission. Da comunicassion nen verificàbij fàite a j'archeòlogh an forma privà stë schéletr a sarìa stàit trovà 4 méter sot tèra, sota a vàire seuli ëd tèra crea e sabion. Ël sabion an vàire pòst a sarìa cementasse. Lë schéletr a podrìa avèj dai 7.000 ai 12.000 agn ([2].
La fondassion
As dis che la fondassion ëd Vian-a a armonta al 595 aGC, a euvra dël cap selt Belovèis.
