O yincuminco no Taywan, sasowalen itini i 17 sici eca ho cimalinahay ko sa’etal lilisay no riyar i Congkuo i ’ayaw, iraay to ko tamdaw maro’ itini i Taywan ato tamdaw no ngataay kanatal.

Saka o ponka ato sowal o nano notimolan kanatal sowal (Astronesian) caira, imatiniay sifo misetek to nia finacadan ira ko 16 finacadan, halo ’Amis, Atayal, Bunun, Paiwan, Puyuma, Rukai, Saisiyat, Thao, Tsou, Yami(Tao), Truku, Kacalan, Sakizaya, Seediq, Hla’alua, Kanakanavu, no Mancin a to’ek o “Hoan” han ko pitahidang, no Dipong a picalap mikowan itiya o Takasako (Takasago) sanay, tayni to ko Kominto a sifo pangangan saan to yincumin i o “Santi-sanpaw/Pinti-sanpaw” sanay pitahidang, onini saheto o piepec pisiiked a pinengneng no itiyaay a mikowan, ikor no 1994 (83) mihecaan pakayni pisa’icel no kapah to syakay onto no yincumin, itiya to mapalasawad ko pisawaco, oya sanpaw sanay mafalic to o “yincumin” a han to ko pitahidang, ta o “Yincuminco” han to ko pitahidang.

O notimolan kanatal a sowal no finacadan o kasakilac itini i Taypinyang ato Intuyang ato Asiya a malitosaay kanatal (Tenok timol kanatal ato Malaty kanatal) a finacadan, oya dadahalay riyar ato kanatal paka’amis o Taywan, pakatimol o New Zealand, pakawali tangasa notimolan Amilika kaetip a Easter kanatal, pakaetip kawali no Africa a Madagascar kanatal, tatenokan o Philippines, Malaysia, Indonesia, New Guinea a kanatal, mika awaay ko Australia, o sadadahalay ko kasakilac a finacadan, polong no tamdaw salongan ira ko 3 walwalan no tamdaw, nika ’alomanay masa’opo itini i kawali katimol Asiya sa’etal.

Notimolan kanatal sowal a finacadan kakahad ko kaledef no sa’etal, kasasiroma no palapatan ato masa patekay to ko mihecaan no likisi masasiroma, ira to ko masasitekeday, kadofahay kasairaira a ponka no notimolan kanatal a sowal no finacadan.

Midotoc to mikingkiway hakasi to no tamdamdaw, notimolan kanatal a sowal no finacadan a ponka malacaday a salongan, halo patakaray to loma’ ato i seraay, miliyas to kaso’emet ato ’oner a fao, o mifalaway ko kamaomah, hali’icep, mafana’ a mitinooay, miwikwik ato mi’adop mifoting no to’asan.

Notimolan kanatal sowal a finacadan i Taywan masakilac i paka’amisay, ira ko sakafana’ to pahapinang nangra to notimolay kanatal a finacadan, ngalef o sakafiyaway a ’etal, masapatekay mihecaan oya to ko kacacofeliw, caay ko mahawitiday a finacadan. Imatiniay a kanatal no Taywan (halo Lanyu) a yincuminco a tamdaw salongan ira ko 54 ’ofad no tamdaw, dengan o 0.002% a notimolan kanatal sowal a finacadan ko tamdaw, nika midotoc to adihayay mikingkiwan mahapinang, o kaliwasakan pasayra i timolan malinah ko rakat o naitiniay i Taywan ko lalowadan a lalengawan, o rakat a malinah no katelangay notimolan kanatal sowal a finacadan kaliwasakan pasayra i timolan malinah ko rakat, kacitodongan kaitiraan a maro’.

Anini romaroma a notimolan kanatal sowal a finacadan sa’etal macacorok no Muslim, Kristokiw, Tingsokiw a serareci ko kafiyol, nanoyaan o yincuminco no Taywan cimirocokay ato mirayrayay to serayan lekakawa a ponka no finacadan.