Youssef I d' Gurnåde (Youssef prumî d' Gurnåde), lomé eto Youssef Aboul Haguigue^[1], e-n arabe classike, أبو الحجاج يوسف بن إسماعيل (abou l-Hajjâj yousef ibn ismâ3îl)^[2], c' esteut l' setinme rwè d' Gurnåde del dinasteye des Nazarîs

I ringna di 1333 a 1354.

I monta sol trône a 15 ans, al moirt di s' fré, Mawoumet IV di Gurnåde.

C' esteut on bea grand foirt ome, foirt sûti, mins d' ene grande douceur. On rwè k' inméve les årts. Mins ki studyive voltî les syinces, aprume li droet. Il est discrît pa Mignolet insi:

C' esteut on bea ome. Droet, bén tcherpinté, li mene avnante, il assaetchive totes les loukeures. I poirtéve ene longue båbe, ki fjheut mî valeur li blankixheur di s' pea. Wåkî do vert tourban des rdjetons do profete, il aveut metou ene blanke rôbe di soye ås botons d' ôr, k' ene cingue di cur brosdêye di fis d' årdjint ratneut-st ås hantches. Ene tchinne d' ôr lyi pindeut so li stoumak, avou on gros diyamant ki rglatixheut come ene sitoele. A ses dmeyès botes boirdêyes di pieles, des rôzes di feu avént l' air di esse novelmint floreyes.^[3]

Il inméve li påye, adon ki tos les rwès do cotoû viként po s' fé l' guere. I n' aveut k' ene idêye e l' tiesse : basti des belès veyes, et î diswalper ene civilizåcion li pus plaijhante possibe.

C' est lu ki bastixha l' Alambra d' Gurnåde. Et toplin des scoles alcoranikes, des moskêyes et des ôtes bastimints a Malaga.

Come muzulman, i shuva li filozofeye soufiye eyet li doctrene malikite po l' comprindaedje di l' Alcoran.^[4]

I mora pougnårdé e s' moskêye. Vola kimint ki l' sinne est racontêye pa Djôzef Mignolet.

L' an 1354, adon k' Youssef priyive e l' moskêye rweyåle do palå, èn enocin potcha sor lu et lyi efonça s' pougnård e costé. Ås esclameures do rwè, les gåres acorît sol côp et l' trovît bagnant e s' sonk, et s' kitoirdant d' må. Poirté dvins ses apårtumints, i mora on pô pus tård.^[5]

Si veye est bén cnoxhowe ca l' grand voyaedjeu Ben Batouta vizita li rweyåme di Gurnåde l' an 1350.

C' est onk des mwaisses persounaedjes do roman e walon da Djôzef Mignolet, «L' amour a l' Alambra».

I gn a so les cmons Wikipedia des imådjes ou fitchîs son a vey avou Youssef I d' Gurnåde .

1. ↑ «Yousef Abul Hagig», ortografiaedje da Djôzef Mignolet dins s' roman «L' amour a l' Alambra».
2. ↑ Li passaedje do «j» arabe (Hajjâj) å «g» amazir (Hâguîgue) si rescontere sovint e l' arabe marokin, dandjreus foirt vijhén di l' arabe di Gurnåde e ç' trevén la.
3. ↑ L' amour a l' Alambra p. 11.
4. ↑ Francisco Bueno, Los reyes de la Alhambra, Ediciones Miguel Sanchez, 7inme edicion, 2022, ISBN 84-7169-082-9, p. 329-362.
5. ↑ «L' amour a l' Alambra» p. 82.